ភ្នំពេញ៖ ប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្ដេចតេជោ ហ៊ុន សែន បានបង្ហើបពីមូលហេតុដែលកម្ពុជាសម្រេចជ្រើសរើសយកប្រព័ន្ធបោះឆ្នោតសមាមាត្រនៅថ្នាក់ខេត្តកាលពីឆ្នាំ១៩៩៣ នោះគឺដើម្បីទប់ស្កាត់កុំឲ្យខ្មែរក្រហមអាចមានសិទ្ធិឡើងមកកាន់អំណាចជាសមាជិកសភាបាន។

ការបង្ហើបឲ្យដឹងពីសម្ដេចតេជោនេះធ្វើឡើងនៅក្នុងសម័យប្រជុំពេញអង្គសភាពព្រឹកថ្ងៃទី១ ខែមេសា ឆ្នាំ២០២៤។

សម្ដេចតេជោបានលើកឡើងថាក្នុងប្រព័ន្ធបោះឆ្នោតដែលបានលើកឡើងដំបូងគឺប្រទេសមហាអំណាចចង់ឱ្យមានប្រព័ន្ធបោះឆ្នោតសមាមាត្រថ្នាក់ជាតិ ដែលសម្ដេចថាការធ្វើបែបនេះនឹងអាចបើកផ្លូវទៅឲ្យខ្មែរក្រហមមានអំណាចឡើងវិញបាន។

សម្ដេចថា៖ «ប្រព័ន្ធដែលប្រទេសធំៗបានរៀបចំតាក់តែងឡើងនៅក្នុងកិច្ចព្រមព្រៀងសន្តិភាពក្រុងប៉ារីសគឺប្រព័ន្ធសមាមាត្រទូទាំងប្រទេស ក៏ប៉ុន្តែនៅក្នុងគោលដៅក្នុងការកាត់ផ្ដាច់កុំឲ្យខ្មែរក្រហមមានកៅអីនៅក្នុងសភាពួកយើងខ្ញុំទាំងអស់គ្នាបានពិភាក្សាគ្នាជ្រើសយកស្នើសុំការធ្វើវិសោធនកម្ម។ដោយរៀបចំប្រព័ន្ធសមាមាត្រតាមខេត្ត ហើយយកទៅឯកភាពគ្នានៅក្នុងទីក្រុងញូវយ៉កក្នុងពេលដែល SNC ចាប់ផ្ដើមចូលទៅកាន់អាសនៈក្នុងអង្គការសហប្រជាជាតិ»៕